Առողջ Սնունդ «Չափաւոր սնունդը առողջութեան գրաւականն է»

«Հալէպ» Հայրենակցական Բարեսիրական Հասարակական կազմակերպութեան, «Սոցիալ հոգեբանական սիրիահայերին» ծրագրի առցանց 5-րդ հաւաք-ժողովը տեղի ունեցաւ Ուրբաթ, 12 Յունիս, 2020, ժամը 13։30ին, 19 անդամուհիներու մասնակցութեամբ:

«Հալէպ» Հ.Բ.Հ.կ.-ի հիմնադիր փոխ նախագահ Ծովիկ Մակարեան-Պայթարեան, մասնակիցները ողջունելէ ետք, ներկայացուց օրուան հիւրը՝ սննդաբան Շաղիկ Մինասեանը:

Սննդաբան Շաղիկ Մինասեան ծնած է Հալէպ, աւարտած է Հալէպի համալսարանի կենսաբանութեան ճիւղը, ապա վկայուած Լիբանանի համալսարանէն սննդաբան մասնագիտութեամբ: Այժմ կը պաշտօնավարէ որպէս համալսարանի դասախօս եւ անհատական խորհրդատուական աշխատանք կը տանի սննդականոնի վերաբերող հարցերով:

Շաղիկ Մինասեան բացատրեց մարմնին համար անհրաժեշտ սննդատեսակներուն գործածութեան, օրուան ընթացքին մարմնին անհրաժեշտ սննադաբաժինը կազմող քանակին եւ տեսակին կարեւորութիւնը, մսեղէնի եւ բանջարեղէնի հաւասարակշռուած գործածութիւնը, որ մարմինը վիտամիններով կ’ապահովեն, բաւարար քանակով ջուր խմելու անհրաժեշտութիւնը, մարմնի նիւթափոխանակութիւնը լիարժէք կատարուելու համար: Թելադրեց ըլլալ շարժուն եւ աշխոյժ:

 Մասնակիցները մեծ հետաքրքրութեամբ լսեցին տրուած խորհուրդները, իրենց մասնակցութիւնը բերին հարցերով եւ ստացան լիարժէք պատասխաններ:

Առ ի յիշեցում, «ՀԱԼԷՊ» ՀԲՀԿ–ի «Սոցիալ–հոգեբանական աջակցութիւն սիրիահայերին» ծրագիրը կը կազմակերպուի անվճար, Հայաստան ապաստան գտած սուրիահայութեան, նպատակ ունենալով դիւրացնել եւ նեցուկ կանգնիլ մեր հայրենակիցներուն իրենց առօրեայ խնդիրները ուշադրութեան արժանի դարձնելու, մեկնակէտ ունենալով դիւրացնել իրենց հոգերն ու մտահոգութիւնները եւ վերջապէս աջակցիլ իրենց ներգրաւուածութեանը Հայաստանեան հասարակական կեանքին մէջ։

Սոյն հաւաք–հանդիպման ընթացքին կը հրաւիրուին դասախօսներ զանազան մասնագիտութիւններով, որոնք իրենց գիտելիքները եւ փորձառութիւնները կը փոխանցեն ներկաներուն։ Հանդիպումները տեղի կ’ունենան իւրաքանչիւր Ուրբաթ, ժամը՝ 13։00-ին, «ՀԱԼԷՊ» ՀԲՀԿ-ի կեդրոնէն ներս։

Հասցէ՝ ք․Երևան, Հիւսիսային պողոտա 11, – 1 յարկ (մուտքը՝ Աբովեան փողոցէն)։ Մուտքն ազատ է բոլորին համար։

Թագաժահրի պատճառով, արտակարգ իրավիճակի ընթացքին հաւաքները կը կազմակերպուին առցանց, կապը կ’ապահովէ համակարգող մարմնի կամաւոր անդամ՝ Վանիա Մսրիէ-Գարաճեանը։

Բժ.Մայտա Չաւուշեան