Առցանց հանդիպում «Սոցիալ Հոգեբանական Աջակցութիւն Սիրիահայերին» անդամներուն հետ

«Հալէպ» Բարեսիրական Հասարակական կազմակերպութեան,«Սոցիալ Հոգեբանական Աջակցութիւն Սիրիահայերին» ծրագրի անդամները, թագաժահրի պատճառով, երկար ընդմիջումէ ետք, իրենց ընթացիկ հաւաք-ժողովը գումարեցին Ուրբաթ՝ 8 Մայիս, 2020-ին, ժամը 1։00-ին, առցանց, zoom ծրագրի միջոցով։Երկրին մէջ տիրող արտակարգ իրավիճակի ընթացքին առաջին առցանց հանդիպման իրենց մասնակցութիւնը բերին 17 ընկերուհիներ։


«Հալէպ» ՀԲՀԿ-ի հիմնադիր փոխ-նախագահ՝ Ծովիկ Պայթարեան-Մակարեանը ողջունեց ներկաները եւ  տեղեկացաւ իրենց առողջութեան ու մտահոգութիւններուն մասին։ Ներկաները՝ իրենց կարգին, կազմակերպութեան եւ մանաւանդ այս ծրագրի անդամներուն հանդէպ իրենց տածած սէրն ու կարօտը յայտնեցին։ 
«Սոցիալ Հոգեբանական Աջակցութիւն Սիրիահայերին»  համակարգող մարմնի կամաւոր անդամ բժ.Մայտա Չաւուշեան անգամ մը եւս ներկաները լուսաբանեց հիւանդութեան վարակման ու անկէ պաշտպանուելու միջոցներուն մասին:

Առ ի յիշեցում, «ՀԱԼԷՊ» ՀԿ–ի «Սոցիալ–հոգեբանական աջակցութիւն սիրիահայերին» ծրագիրը կը կազմակերպուի անվճար, Հայաստան ապաստան գտած սուրիահայութեան, նպատակ ունենալով դիւրացնել եւ նեցուկ կանգնիլ մեր հայրենակիցներուն իրենց առօրեայ խնդիրները ուշադրութեան արժանի դարձնելու, մեկնակէտ ունենալով դիւրացնել իրենց հոգերն ու մտահոգութիւնները եւ վերջապէս աջակցիլ իրենց ներգրաւուածութեանը Հայաստանեան հասարակական կեանքին մէջ։


Սոյն հաւաք–հանդիպումի ընթացքին կը հրաւիրուին դասախօսներ զանազան մասնագիտութիւններով, որոնք իրենց գիտելիքները եւ փորձառութիւնները կը փոխանցեն ներկաներուն։


Հանդիպումները տեղի կ’ունենային իւրաքանչիւր Ուրբաթ, ժամը՝ 13։00-ին, «ՀԱԼԷՊ» ՀԲՀԿ-ի կեդրոնէն ներս։ Հասցէ՝ ք․Երևան, Հիւսիսային պողոտա 11, – 1 յարկ (մուտքը՝ Աբովեան փողոցէն)։ Մուտքն ազատ է բոլորին համար։Թագաժահրի պատճառով, արտակարգ իրավիճակի ընթացքին հաւաքները կը կազմակերպուին առցանց։