«Ինքզինքնին յարգող բոլոր կիներուն իտեալը միայն հաճելի ըլլալը պէտք չէ ըլլայ, այլ երկրի վրայ գործօն բարերար տարր մը դառնալը»: Զապէլ Եսայեան

«Հալէպ» Հայրենակցական Հասարակական Բարեսիրական Կազմակերպութեան «Սոցիալ-հոգեբանական ծառայութիւն սիրիահայերին» ծրագրի առցանց 8-րդ հաւաք-ժողովը տեղի ունեցաւ Ուրբաթ, 3 Յուլիս, 2020, ժամը 13։00-ին, 14 անդամուհիներու մասնակցութեամբ:

«Հալէպ» Հ.Բ.Հ.կ. «Սոցիալ-հոգեբանական ծառայութիւն սիրիահայերին» ծրագրի համակարգող մարմնի կամաւոր անդամ բժ.Մայտա Չաւուշեան, մասնակիցները ողջունելէ ետք, անցաւ հանդիպման նիւթին մատուցման: Հանդիպումը նուիրուած էր հայ մեծ գրող, հրապարակախօս, հասարակական գործիչ, գրականագէտ՝ Զապէլ Եսայեանին:

Զ.Եսայեան ծնած է Պոլիս, բարձագոյն կրթութիւնը ստացած է Փարիզի Սորպոն համալսարանին մէջ: Ան առաջադէմ գաղափարներ կրող, յատկապէս կանանց կրթութեան եւ հասարակութեան մէջ կարեւոր դեր գրաւելու ջատագովն էր: Բարձր կը գնահատէր ազնւութիւնը, եւ արդար միջոցներով նպատակի մը հասնելու ձգտումը: Իր ընտանիքին անցուկ վիճակը ընկճելու փոխարէն, կոփած եւ կրթած էր զինք՝ դարձնելով ազատութեան ձգտող անձնաւորութիւն մը:

Ան յետ եղեռնի առաջին եւ միակ կին մտաւորականն էր, որուն գլխուն կախուած էր եաթաղանը: Մազապուրծ, ապաստանած էր Թիֆլիս, ապա անցած էր Փարիզ: Խորհրդային Հայաստանի կառավարութեան հրաւէրով կանչուած էր Հայաստան, դասախօսելու Պետական Համալսարանին մէջ: Սակայն այստեղ եւս հետապնդուած եւ աքսորուած էր, ապա անյայտ պայմաններու տակ վախճանած Պաքուի բանտին մէջ:

Կենսագրականը ներկայացնելէ ետք, բժ.Մայտա Չաւուշեան խօսքը փոխանցեց «Հալէպ» Հ.Բ.Հ.Կ. «Սոցիալ-հոգեբանական ծառայութիւն սիրիահայերին» ծրագրի համակարգող մարմնի կամաւոր անդամ Վանիա Մսրիէ-Գարաճեանին, որ ընթերցեց Զապէլ Եսայեանի յայտնի նամակը ուղղուած իր աղջկան եւ «երբ այլեւս չեն սիրէր» վիպակէն հատուած մը:

Տեղի ունեցաւ նիւթին վերաբերող քննարկում եւ կարծիքներու փոխանակում, ներկաներուն աշխոյժ մասնակցութեամբ: Հանդիպումը աւարտեցաւ շնորհակալական խօսքերով եւ ջերմ բարեմաղթանքներով:

Առ ի յիշեցում, «ՀԱԼԷՊ» ՀԲՀԿ–ի «Սոցիալ–հոգեբանական աջակցութիւն սիրիահայերին» ծրագիրը կը կազմակերպուի անվճար, Հայաստան ապաստան գտած սուրիահայութեան, նպատակ ունենալով դիւրացնել եւ նեցուկ կանգնիլ մեր հայրենակիցներուն իրենց առօրեայ խնդիրները ուշադրութեան արժանի դարձնելու, մեկնակէտ ունենալով դիւրացնել իրենց հոգերն ու մտահոգութիւնները եւ վերջապէս աջակցիլ իրենց ներգրաւուածութեանը Հայաստանեան հասարակական կեանքին մէջ։

Սոյն հաւաք–հանդիպումի ընթացքին կը հրաւիրուին դասախօսներ զանազան մասնագիտութիւններով, որոնք իրենց գիտելիքները եւ փորձառութիւնները կը փոխանցեն ներկաներուն։

Հանդիպումները տեղի կ’ունենան իւրաքանչիւր Ուրբաթ, ժամը՝ 13։00-ին, «ՀԱԼԷՊ» ՀԲՀԿ-ի կեդրոնէն ներս։ Հասցէ՝ ք․Երևան, Հիւսիսային պողոտա 11, – 1 յարկ (մուտքը՝ Աբովեան փողոցէն)։

Նոր Թագաժահրի պատճառով մեկուսացման ընթացքին, հանդիպումը տեղի կ’ունենայ տեսակապով, որ կ’ապահովէ համակարգող մարմնի կամաւոր անդամ Վանիա Մսրիէ-Գարաճեան: Մուտքը ազատ է բոլորին համար:

Բժ.Մայտա Չաւուշեան