Խօսքի ոյժը «Խօսքը մարդկային ոյժի զօրավարն է» Վլ.Մայակովսկի

«Հալէպ» Հայրենակցական Հասարակական Բարեսիրական Կազմակերպութեան «Սոցիալ-հոգեբանական ծառայութիւն սիրիահայերին» ծրագրի անդամներու առցանց 7-րդ հաւաք-ժողովը տեղի ունեցաւ Ուրբաթ, 26 Յունիս, 2020, ժամը 13.00-ին, 19 անդամուհիներու ներկայութեամբ:

«Հալէպ» Հ.Կ.-ի «Սոցիալ-հոգեբանական ծառայութիւն սիրիահայերին» ծրագրի համակարգող մարմնի կամաւոր անդամ բժ. Մայտա Չաւուշեան բարի գալուստի խօսքերով ողջունեց ներկաները եւ ներկայացուց հիւրը: Օրուայ հիւր դասախօսն էր՝ Լոտուս կեդրոնի հիմնադիր՝ Տ. Կարինէ Ասրեանը, որը կը համարուի Հայաստանի միակ մասնագէտը, ուղեղի յատուկ յաճախականութիւններու եւ էներգեթիք կեդրոններու վրայ աշխատողը (Teta healer), առողջութեան բարելաւման, կեանքի բոլոր ասպարէզներուն մէջ առաջխաղացման նպատակով:

Հանդիպման նիւթն էր՝ «Խօսքի ոյժը եւ անոր ազդեցութիւնը մարդուն վրայ»: Տ. Ասրեան խօսեցաւ մարդու «Էներկեթիք» դաշտին, կենսական ոյժին, բնութեան ոյժերուն եւ այս բոլորին ու մարդու փոխազդեցութեան մասին: Մարդ էակը իր շուրջը ունի կենսական ամպ մը «Աուրա», որուն զօրութիւնը անհատէ անհատ կը տարբերի. իսկ մարմնին մէջ կան եօթ կենսական կեդրոններ, «Չաքրա», որոնք կը տնօրինեն մարդու մարմնական եւ մտային ոլորտները: Այս հանգամամքը թոյլ կու տայ որ մարդ տեւական ազդեցութեան տակ ըլլայ այս կենսական ոյժերուն իր լաւ եւ վատ դրսեւորումներով:

Իւրաքանչիւր միտք, խօսք, որ դուրս կու գայ մարմնէն դէպի կենսական դաշտ, առաջին հերթին կը վերադառնայ անոր, որմէ ծագած է այդ միտքը կամ խօսքը, եւ աւելի նուազ չափով անոր, որուն ուղղուած կ՚ըլլայ: Այսպիսով, պէտք է կեդրոնանալ դրական խօսքի եւ գործի վրայ եւ հեռու մնալ բացասական ազդակներէ, չարախօսութիւններէ, կեղծ լրատուական հոսքէ, «մաքրել մտքի դաշտը» շնչառական վարժութիւններով, վերականգնել մարմնի եւ մտքի անդորրը եւ միշտ դրականը փոխանցել շրջապատին եւ համայն մարդկութեան:

 Հանդիպումը անցաւ հետաքրքրական ու մտերմիկ, եղան հարցումներ, որոնց Տ.Ասրեան տուաւ սպառիչ պատասխաններ: Մասնակիցները բաժնուեցան շնորհակալական խօսքերով եւ ջերմ բարեմաղթանքներով:

Առ ի յիշեցում, «ՀԱԼԷՊ» ՀԲՀԿ–ի «Սոցիալ–հոգեբանական աջակցութիւն սիրիահայերին» ծրագիրը կը կազմակերպուի անվճար, Հայաստան ապաստան գտած սուրիահայութեան, նպատակ ունենալով դիւրացնել եւ նեցուկ կանգնիլ մեր հայրենակիցներուն իրենց առօրեայ խնդիրները ուշադրութեան արժանի դարձնելու, մեկնակէտ ունենալով դիւրացնել իրենց հոգերն ու մտահոգութիւնները եւ վերջապէս աջակցիլ իրենց ներգրաւուածութեանը Հայաստանեան հասարակական կեանքին մէջ։

Սոյն հաւաք–հանդիպման ընթացքին կը հրաւիրուին դասախօսներ զանազան մասնագիտութիւններով, որոնք իրենց գիտելիքները եւ փորձառութիւնները կը փոխանցեն ներկաներուն։ Հանդիպումները տեղի կ’ունենան իւրաքանչիւր Ուրբաթ, ժամը՝ 13։00-ին, «ՀԱԼԷՊ» ՀԲՀԿ-ի կեդրոնէն ներս։

Հասցէ՝ քԵրևան, Հիւսիսային պողոտա 11, – 1 յարկ (մուտքը՝ Աբովեան փողոցէն)։ Մուտքն ազատ է բոլորին համար։

Թագաժահրի պատճառով, արտակարգ իրավիճակի ընթացքին հաւաքները կը կազմակերպուին առցանց, կապը կ’ապահովէ համակարգող մարմնի կամաւոր անդամ՝ Վանիա Մսրիէ-Գարաճեանը։

 Բժ.Մայտա Չաւուշեան