Համբարձման առցանց տօնակատարութիւն

Համբարձման գիշեր,էն դիւթիչ գիշեր,
Կայ հրաշալի,երջանիկ վայրկեան.
Բացւում են ոսկի երկնքի դռներ,
Ներքեւ պապանձւում,լռում ամեն բան.
Ու աստուածային անհաս խորհրդով,
Լցւում բովանդակ նրա սուրբ գթով։

Էն վեհ վայրկեանին չքնաղ գիշերի,
Երկնքի անհուն հեռու խորքերից,
Անմուրազ մեռած սիրահարների,
Աստղերը թռած իրար են գալիս.
Գալիս կարօտով մի հեղ համբուրւում,
Աշխարհից հեռո՛ւ, լազուր կամարում:


Հ.Թումանեան.

«Հալէպ» Հայրենակցական Բարեսիրական Հասարակական կազմակերպութեան, «Սոցիալ Հոգեբանական Աջակցութիւն Սիրիահայերին» ծրագրի անդամները, իրենց ընթացիկ հաւաք-ժողովը գումարեցին Ուրբաթ՝ 22 Մայիս, 2020-ին, ժամը 13.00-ին, համացանցի միջոցաւ, 27 անդամուհիներու մասնակցութեամբ: «Հալէպ» Հ.Կ.-ի հիմնադիր փոխ նախագահ՝ Ծովիկ Մակարեան-Պայթարեան բարի գալուստի խօսքով ողջունեց ներկաները, հետաքրքրուեցաւ իւրաքանչիւր անդամուհիի առողջական վիճակին, եւ իրենց այժմեայ մտահոգութիւններուն մասին: Այնուհետեւ խօսքը փոխանցեց համակարգող մարմնի կամաւոր անդամ բժ.Մայտա Չաւուշեանին:

Հանդիպումը նուիրուած էր Համբարձման տօնին: Բժ. Մայտա Չաւուշեան ներկայացուց տօնին նուիրուած ժողովրդական եւ եկեղեցական հաւատալիքներու աւանդական սովորութիւնները: Դարերէ եկած ժողովրդական տօնը միանալով եկեղեցական՝ Քրիստոսի յարութեան տօնին, կազմած է տօնախմբութիւններու գեղեցիկ փունջ մը:

Համբարձումը ժողովրդական տօներու ամենաուրախ տօներէն մէկն է, նուիրուած՝ բնութեան ծաղկումին, ծաղկունքին, աստղերուն, լուսնին, երիտասարդ՝ սիրող սրտերու իրար միանալու մեծ փափաքին, հաւատալով, որ ծաղիկներուն եւ ջուրին, տերեւներուն եւ խիճերուն, երկնքին եւ աստղերուն միջամտութեամբ եւ կամքով, «վիճակը» պիտի սրբագործուէր եւ պիտի կատարուէր բոլորին բաղձանքը: Անոր համար ծաղկազարդ, եօթ աղբիւրի ջուրով, եօթ ծաղկի թերթերով լեցուն վիճակի փարջը ամբողջ գիշեր կը դրուէր բաց երկնքին տակ:

Հայ ժողովուրդը բազմաթիւ երգեր, վիճակի քառատողեր՝ «ջան գիւլում»ներ ստեղծած եւ նուիրած է այս տօնին, գովերգելով բնութիւնը եւ սէրը:

Հանդիպման ընթացքին, ներկաներու մասնակցութեամբ երգուեցան այս երգերէն, ընթերցուեցան վիճակի մաղթանքներ:

Համբարձում եայլա,եայլա ջան եայլա,
Լաւ օրեր եայլա,եայլա ջան եայլա.

Մասնակիցները մեծ սիրով եւ կարօտով ողջունեցին իրար, եւ մեծ գոհունակութիւն յայտնեցին իրենց այս հանդիպման առիթը ընծայելու համար: Հանդիպումը աւարտեցաւ հրաժեշտի ջերմ խօսքերով:

Առ ի յիշեցում, «ՀԱԼԷՊ» ՀԿ–ի «Սոցիալ–հոգեբանական աջակցութիւն սիրիահայերին» ծրագիրը կը կազմակերպուի անվճար, Հայաստան ապաստան գտած սուրիահայութեան, նպատակ ունենալով դիւրացնել եւ նեցուկ կանգնիլ մեր հայրենակիցներուն իրենց առօրեայ խնդիրները ուշադրութեան արժանի դարձնելու, մեկնակէտ ունենալով դիւրացնել իրենց հոգերն ու մտահոգութիւնները եւ վերջապէս աջակցիլ իրենց ներգրաւուածութեանը Հայաստանեան հասարակական կեանքին մէջ։
Սոյն հաւաք–հանդիպումի ընթացքին կը հրաւիրուին դասախօսներ զանազան մասնագիտութիւններով, որոնք իրենց գիտելիքները եւ փորձառութիւնները կը փոխանցեն ներկաներուն։ Հանդիպումները տեղի կ’ունենան իւրաքանչիւր Ուրբաթ, ժամը՝ 13։00-ին, «ՀԱԼԷՊ» ՀԲՀԿ-ի կեդրոնէն ներս։
Հասցէ՝ ք․Երևան, Հիւսիսային պողոտա 11, – 1 յարկ (մուտքը՝ Աբովեան փողոցէն)։

Նոր Թագաժահրի պատճառով մեկուսացման ընթացքին, հանդիպումը տեղի կ’ունենայ տեսակապով, որ կ’ապահովէ համակարգող մարմնի կամաւոր անդամ Վանիա Մսրիէ-Գարաճեան: Մուտքը ազատ է բոլորին համար:

Բժ.Մայտա Չաւուշեան