Մարմնամարզության և առողջ ապրելակերպի կարևորությունը

«Հալէպ»Բարեսիրական Հասարակական կազմակերպութեան,«Սոցիալ Հոգեբանական Աջակցութիւն Սիրիահայերին»համակարգող մարմինը, իր ընթացիկ հաւաք-ժողովը գումարեց Ուրբաթ՝7 Փետրուար 2020 ժամը 1.30ին. «Հալէպ»Բ.Հ .Կ.ի կեդրոնէն ներս,ներկայութեամբ 34 անդամուհիներու:

«Հալէպ» Բ.Հ.Կ.հիմնադիր փոխ նախագահ՝ Ծովիկ Պայթարեան-Մակարեան բարի գալուստի խօսքով ողջունեց ներկաները: Մօտալուտ Բարեկենդանի տօնի առիթով,համակարգող մարմնի կամաւոր անդամ բժ.Մայտա Չաւուշեան խօսեցաւ «Բարեկենդան»ի բարի կենդանութիւն մաղթող սովորութիւններու,որպէս ամենաժողովրդական եւ ուրախ տօնախմբութիւններէն մին, բնութեան զարթօնքի հետ առնչուող ծէսերու եւ տօնի երկշաբաթեայ ընթացքին՝ դիմակաւոր խորհրդանշական կերպարներու, երգ ու պարի, տիրող ուրախ եւ ազատ մթնոլորտի մասին:Ան ներկայացուց նաեւ բարեկենդանը խորհրդանշող «Ուտիս տատ» տիկնիկը,որ,այդ օրերուն ժողովուրդին առատ կերուխումը քաջալերող կերպարն էր:

Օրուան հիւրն էր, Երեւանի Ֆիզիկական կուլտուրայի համալսարանի շրջանաւարտ, «ՖԻԹՆԵՍ ՄԻՔՍ-ՃԱՄԲԻՆԿ»-ի Զարգացման տնօրէն, «ԻՒՐ ՀԵԼԹ ՖՐԵՆՏ»ի Զարգացման տնօրէն, «ՔՈՐԱԼ ՔԼԱՊ»-ի Զարգացման տնօրէն, Լիանա Բախտիկեան:

Ան խօսեցաւ կանոնաւոր կերպով սնուելու կարեւոր դերին մասին, նախաճաշի անհրաժեշտութեան, ճաշատեսակներու, տեղական աճող մթերքի աւելի սննդարար եւ օգտակար ըլլալու մասին: Խրախուսեց աշխոյժ կեանք վարել, խուսափիլ նստակեաց ըլլալէ, շեշտեց «քալելու»կարեւորութիւնը, որպէս մարզանքին փոխարինող միջոց:

Լիանա Բախտիկեանի թելադրութեամբ, պարային շարժումներով եւ երաժշտութեան հանգերով ներկաները կատարեցին վարժութիւններ, մեծ ոգեւորութեամբ: Ներկաները հիւրասիրուեցան քաղցրաւենիքով եւ սուրճով: Հանդիպումը աւարտեցաւ հրաժեշտի ջերմ բարեմաղթանքներով:

Բժ.Մայտա Չաւուշեան.

Առ ի յիշեցում, «ՀԱԼԷՊ» ՀԿ–ի «Սոցիալ–հոգեբանական աջակցութիւն սիրիահայերին» ծրագիրը կը կազմակերպուի անվճար, Հայաստան ապաստան գտած սուրիահայութեան, նպատակ ունենալով դիւրացնել եւ նեցուկ կանգնիլ մեր հայրենակիցներուն իրենց առօրեայ խնդիրները ուշադրութեան արժանի դարձնելու, մեկնակէտ ունենալով դիւրացնել իրենց հոգերն ու մտահոգութիւնները եւ վերջապէս աջակցիլ իրենց ներգրաւուածութեանը Հայաստանեան հասարակական կեանքին մէջ։

Սոյն հաւաք–հանդիպումի ընթացքին կը հրաւիրուին դասախօսներ զանազան մասնագիտութիւններով, որոնք իրենց գիտելիքները եւ փորձառութիւնները կը փոխանցեն ներկաներուն։

Հանդիպումները տեղի կ’ունենան իւրաքանչիւր Ուրբաթ, ժամը՝ 13։00-ին, «ՀԱԼԷՊ» ՀԲՀԿ-ի կեդրնէն ներս։ Հասցէ՝ ք․Երևան, Հիւսիսային պողոտա 11, – 1 յարկ (մուտքը՝ Աբովեան փողոցէն)։

Մուտքն ազատ է բոլորի համար։