Նամակ՝ ուղղված ՀՀ Սփյուռքի գործերի գլխավոր հանձնակատար Զարեհ Սինանյանին

13.04.2020թ.

ՀՀ Սփյուռքի գործերի գլխավոր հանձնակատար

պարոն Զարեհ Սինանյանին

Հարգարժան պրն. Սինանյան,

«ՀԱԼԵՊ» հայրենակցական բարեսիրական հասարակական կազմակերպության ( «ՀԱԼԵՊ» ՀԿ) Գործադիր մարմինն իր զորակցությունն է հայտնում ՀՀ Կառավարությանը՝ պանդեմիայի այս դժվարին շրջանում: Գիտակցում ենք ներկայիս դժվարին դրությունը և բարձր ենք գնահատում Կառավարության կողմից իրականացվող կորոնավիրուսի հաղթահարմանն ուղղված ջանքերը:

 Ցավոք, սոցիալական աջակցության վերջին ծրագրերը, որոնք իրականացվում են ՀՀ Աշխատանքի և սոցիալական հարցերի նախարարության կողմից, մեծամասամբ չեն ընդգրկում Հայաստանում ապաստանած սիրիահայ ընտանիքներին: Ուստի, որպես սիրիահայերին մարդասիրական աջակցության և նրանց ինտեգրման հարցերով զբաղվող հասարակական կազմակերպություն, սույն նամակով  դիմում ենք Ձեզ, առանձին օգնություն ցուցաբերել խոցելի վիճակում գտնվող սիրիահայ ընտանիքներին: Վերջիններս գտնվում են բավական ծանր վիճակում, քանի որ ի տարբերություն տեղացիների, սիրիահայ ընտանիքները բնակվում են վարձակալությամբ, ինչն էլ ավելի է խոցելի դարձնում նրանց, հաշվի առնելով այն հանգամանքը, որ այս շրջանում զրկվել են նաև իրենց աշխատանքից և չունեն այլ եկամուտ:                                                                                  

Այս օրերին «ՀԱԼԵՊ» ՀԿ-ին են դիմել մեծ թվով սիրիահայ ընտանիքներ, ովքեր չեն կարողանում հոգալ իրենց օրվա ապրուստը, ուստի «ՀԱԼԵՊ» ՀԿ-ը պատրաստակամ է  համագործակցել համապատասխան նախարարության և այլ կառույցների հետ՝ աջակցելու այդ ընտանիքներին այս ժամանակաշրջանում:                          

Վստահ ենք՝  բարձր գնահատելով Հայաստանում ապաստանած սիրիահայերի ներդրումը Հայաստանի զարգացման գործում և հաշվի առնելով նրանց՝ էլ ավելի խոցելի դրությունը, կընդառաջեք մեր խնդրագրին՝ աջակցելով նաև սիրիահայ ընտանիքներին:

Նամակի բնօրինակը՝

Պատասխան նամակ՝ ուղղված ՀԱԼԵՊ ՀԿ-ին՝ Սփյուռքի գործերի գլխավոր հանձնակատարի գրասենյակից՝


Հարգանքով՝

Անի Բալխյան

Հիմնադիր նախագահ

«ՀԱԼԵՊ» ՀԿ