Սարդարապատ,Ղարաքիլիսա,Բաշ Ապարան. Հայաստանի առաջին հանրապետութիւն

«Հալէպ» Հայրենակցական Բարեսիրական Հասարակական կազմակերպութեան, «Սոցիալ–հոգեբանական աջակցութիւն սիրիահայերին» ծրագրի առցանց 4-րդ հաւաք-ժողովը տեղի ունեցաւ Ուրբաթ՝ 29 Մայիս, 2020-ին,ժամը 13։00-ին, 23 անդամուհիներու մասնակցութեամբ: Հանդիպումը նուիրուած էր Հայաստանի առաջին հանրապետութեան կազմաւորման 102-րդ ամեակին:

«Հալէպ» Հ.Բ.Հ.կ.-ի հիմնադիր փոխ-նախագահ Ծովիկ Մակարեան-Պայթարեան, մասնակիցները ողջունելէ ետք, շնորհաւորեց ներկաները անկախութեան տօնին առթիւ, խօսեցաւ օրուան նշանակութեան եւ անոր առնչուող կարեւորոգոյն դրուագներուն՝ Բաշ Ապարան,Ղարաքիլիսա եւ Սարդարապատ: Ապա խօսքը փոխանցեց, համակարգող մարմնի կամաւոր անդամ՝ Սալբի Գարակիւլեանին:

Ան պատմական ակնարկով ներկայացուց հայ ժողովուրդի անձնուրաց սխրանքին հետեւանքով ձեռք բերուած անկախութիւնը եւ 1918 թուականին, առաջին հանրապետութեան ստեղծումը: Սալբի Գարակիւլեան արծարծեց նաեւ երկրորդ նիւթ մը՝ «Արտակարգ իրավիճակներուն» հանդէպ մարդու վերաբերմունքին մասին, ինչպիսին է հիմա թագաժահրի ստեղծած տագնապը, որ իւրաքանչիւր տագնապ յաղթահարելու լաւագոյն միջոցը լաւատես եւ դրական ըլլալն է, լաւատեսութիւն պահպանելով եւ իրար փոխանցելով, ըլլալ ամուր, տոկու եւ քաղել այն,ինչ օգտակար է եւ ուսանելի: Այս նիւթին շուրջ տեղի ունեցաւ ընդարձակ զրոյց եւ կարծիքներու փոխանակում անդամուհիներուն մասնակցութեամբ:

Առ ի յիշեցում, «ՀԱԼԷՊ» ՀԲՀԿ–ի «Սոցիալ–հոգեբանական աջակցութիւն սիրիահայերին» ծրագիրը կը կազմակերպուի անվճար, Հայաստան ապաստան գտած սուրիահայութեան, նպատակ ունենալով դիւրացնել եւ նեցուկ կանգնիլ մեր հայրենակիցներուն իրենց առօրեայ խնդիրները ուշադրութեան արժանի դարձնելու, մեկնակէտ ունենալով դիւրացնել իրենց հոգերն ու մտահոգութիւնները եւ վերջապէս աջակցիլ իրենց ներգրաւուածութեանը Հայաստանեան հասարակական կեանքին մէջ։

Սոյն հաւաք–հանդիպումի ընթացքին կը հրաւիրուին դասախօսներ զանազան մասնագիտութիւններով, որոնք իրենց գիտելիքները եւ փորձառութիւնները կը փոխանցեն ներկաներուն։

Հանդիպումները տեղի կ’ունենան իւրաքանչիւր Ուրբաթ, ժամը՝ 13։00-ին, «ՀԱԼԷՊ» ՀԲՀԿ-ի կեդրոնէն ներս։ Հասցէ՝ ք․Երևան, Հիւսիսային պողոտա 11, – 1 յարկ (մուտքը՝ Աբովեան փողոցէն)։

Նոր Թագաժահրի պատճառով մեկուսացման ընթացքին, հանդիպումը տեղի կ’ունենայ տեսակապով, որ կ’ապահովէ համակարգող մարմնի կամաւոր անդամ Վանիա Մսրիէ-Գարաճեան: Մուտքը ազատ է բոլորին համար:

Բժ.Մայտա Չաւուշեան