«Սոցիալ Հոգեբանական Աջակցութիւն Սիրիահայերին» անդամներու 2-րդ առցանց հանդիպում

Ուրբաթ՝ 15 Մայիս, 2020-ին, ժամը 1։00-ին, «Հալէպ» Բարեսիրական Հասարակական կազմակերպութեան «Սոցիալ Հոգեբանական Աջակցութիւն Սիրիահայերին» ծրագրի անդամները, իրենց ընթացիկ հաւաք-ժողովը գումարեցին առցանց, zoom ծրագրի միջոցով։ 24 ընկերուհիներ իրենց տուներէն միացան հաւաք-ժողովին։

«Հալէպ» ՀԲՀԿ-ի հիմնադիր փոխ-նախագահ՝ Ծովիկ Պայթարեան-Մակարեանը ողջունեց ներկաները եւ իւրաքանչիւր մասնակցի մտահոգութիւնը լսելէ ետք խօսքը փոխանցեց բժշկուհի՝ Մայտա Չաւուշեանին, որ իր կարգին պատասխանեց բոլորին հարցերուն, ի մասնաւորի թագաժահրի հետ կապուած։

Առ ի յիշեցում, «ՀԱԼԷՊ» ՀԲՀԿ–ի «Սոցիալ–հոգեբանական աջակցութիւն սիրիահայերին» ծրագիրը կը կազմակերպուի անվճար, Հայաստան ապաստան գտած սուրիահայութեան, նպատակ ունենալով դիւրացնել եւ նեցուկ կանգնիլ մեր հայրենակիցներուն իրենց առօրեայ խնդիրները ուշադրութեան արժանի դարձնելու, մեկնակէտ ունենալով դիւրացնել իրենց հոգերն ու մտահոգութիւնները եւ վերջապէս աջակցիլ իրենց ներգրաւուածութեանը Հայաստանեան հասարակական կեանքին մէջ։

Սոյն հաւաք–հանդիպման ընթացքին կը հրաւիրուին դասախօսներ զանազան մասնագիտութիւններով, որոնք իրենց գիտելիքները եւ փորձառութիւնները կը փոխանցեն ներկաներուն։ Հանդիպումները տեղի կ’ունենան իւրաքանչիւր Ուրբաթ, ժամը՝ 13։00-ին, «ՀԱԼԷՊ» ՀԲՀԿ-ի կեդրոնէն ներս։

Հասցէ՝ ք․Երևան, Հիւսիսային պողոտա 11, – 1 յարկ (մուտքը՝ Աբովեան փողոցէն)։ Մուտքն ազատ է բոլորին համար։

Թագաժահրի պատճառով, արտակարգ իրավիճակի ընթացքին հաւաքները կը կազմակերպուին առցանց, կապը կ’ապահովէ համակարգող մարմնի կամաւոր անդամ՝ Վանիա Մսրիէ-Գարաճեանը։