Սոցիալ-հոգեբանական աջակցությանն ուղղված հերթական հանդիպումը

2018թ.  նոյեմբերի 2-ին «ՀԱԼԵՊ» հայրենակցական բարեսիրական հասարակական կազմակերպությունում («ՀԱԼԵՊ» ՀԿ) կազմակերպվեց սոցիալ-հոգեբանական աջակցություն տրամադրող հերթական հանդիպումը՝  Հայաստանում հաստատված սիրիահայերի համար:

Հանդիպան հյուրը մեզ քաջ հայտնի՝ Արարատյան Հայրապետական թեմի Մրգավան գյուղի Ս․ Հակոբ եկեղեցու հոգևոր հովիվ Տ․Պարգև քահանա Պալգևորգյանն էր,  ով հանդիպումը սկսեց աղոթքով:  Տեր Պարգև քահանան շարունակեց խոսել Հայ Առաքելական եկեղեցու  7 մահացու մեղքերից վեցերորդի՝ որկրամոլության մասին:

Որկրամոլությունը կերակրի նկատմամբ անսահման հակումն է,  երբ մարդ այլևս չի հասկանում և չի զգում իր բավարարվածությունը, իր կուշտ լինելը:

Տեր-Պարգևը մեջբերումներ կատարեց Աստվածաշնչից,  նշելով, որ ագահությունը ծնում  է  որկրամոլությունը։ Քրիստոսն ասում է.  «Միայն հացով չի ապրում մարդ, այլ այն ամեն խոսքով,  որ ելնում է Աստծո բերանից» (Մատթ. 4.4, Ղուկ. 4.4): Իսկ որկրամոլությունը կարծես ելնում է Քրիստոսի դեմ և հակառակը պնդում.  «Միայն հացով է ապրում մարդ»։ Ուտելը միջոց է և ոչ թե նպատակ, մինչդեռ որկրամոլի համար ուտելը դառնում է գերագույն նպատակ։

Վերջում, ներկաները հանդես եկան հարցադրումներով և ստացան իրենց հուզող հարցերի պատասխանները։

Հիշեցնենք՝ «ՀԱԼԵՊ» ՀԿ-ի «Սոցիալ-հոգեբանական աջակցություն սիրիահայերին» ծրագրի շրջանակում կազմակերպվող անվճար հանդիպումների նպատակն է օժանդակել սիրիական հակամարտության միջով անցած և ծանր հոգեբանական դրությունում հայտնված անձանց վերականգնման գործընթացին և նպաստել նրանց ակտիվ ներգրավմանը հայաստանյան քաղաքացիական կյանում։
Հանդիպումների շրջանակում հյուրընկալվում են խոսնակներ, ովքեր իրենց կարողությունները և գիտելիքներն են կիսում ներկաների հետ՝ աջակցելով նրանց սոցիալ-հոգեբանական  վերականգնմանը։
Հանդիպումները տեղի են ունենում յուրաքանչյուր ուրբաթ՝ «ՀԱԼԵՊ» ՀԿ-ում։
Հասցե՝ քԵրևան, Հյուսիսային պողոտա 11, – 1 հարկ (մուտքը՝ Աբովյան փողոցից)։