«Սոցիալ-հոգեբանական աջակցություն սիրիահայերին» ծրագրի հերթական հանդիպումը` կարուձեւի հմտութիւններ

«Յաւերժ փառք ու պատիւ Մայիսի 9-ը կերտող հայ ժողովուրդի զաւակներուն, խոնարհում մեր հայրենիքի հերոսներուն եւ նահատակներուն յիշատակին առաջ» այսպէս սկսաւ իր խօսքը «Հալէպ» հայրենակցական բարեսիրական հասարակական կազմակերպութեան հիմնադիր փոխնախագահ՝ Ծովիկ Մակարեան Պայթարեան,կատարելով բացումը «Սոցիալ հոգեբանական աջակցութիւն սիրիահայերի» ծրագրի հերթական հանդիպումին,որ տեղի ունեցաւ Ուրբաթ 10-Մայիս, 2019ին, կէսօրէ ետք ժամը 2ին:Ներկայ էին 36անդամուհի:

Հաւաքը վարեց Ծովիկ Մակարեան-պայթարեան. ան Մայիսեան եռատօնի առթիւ շնորհաւորեց ներկաները: «Ծանօթանանք մեր արժէքներուն» նիւթն էր՝ Մայիսեան եռատօնը, ան նշեց,որ հայ ժողովուրդին համար Մայիս ամիսը եղած է յաղթանակներու ամիս, Աւարայրէն մինչեւ Սարդարապատ, Հայրենական մեծ պատերազմ եւ Շուշիի ազատագրում, որուն 27ամեակն էր այս տարի: Եռատօնը կ’ընդգրկէ.- Շուշիի ազատագրումը, Հայրենական մեծ պատերազմի յաղթական աւարտը, Արցախի պաշտպանութեան բանակի ստեղծման տարեդարձը, Շուշիի ազատագրման գործողութիւնը, որ կը կոչուի «Հարսանիք լեռներում», տեղի ունեցած է 1992-ի Մայիս 8-9 ին: Այն իրականացուցին1200 կամաւոր խիզախ հայորդիներ, ղեկավար ունենալով ինքնապաշտպանական ուժերու հրամանատար, քոմանտոս Արկադի Տէր-Թադեւոսեանը: Շուշիի ազատագրումէն ետք ստեղծուեցաւ Արցախի պաշտպանութեան բանակը:

Հայրենական մեծ պատերազմը սկսած է 1939-ին աւարտած՝ 1945-ին:Պատերազմին մասնակցած են 600000 հայ մարտիկ, որ մեր փոքրաթիւ ժողովուրդին համեմատ բնակչութեան ամենամեծ տոկոսը կը կազմէր: Անոնցմէ տուն վերադարձան 300000-ը: Հայաստանը ունեցաւ103 հերոս որոնց թուին էր կրկնակի հերոս Նելսոն Ստեփանեան, 4 մարաջախտ  (մարշալ)՝ Յովհաննէս Բաղրամեան, Համազասպ Պապաճանեան, Արմենակ Խամբերեանց եւ ծովակալ (ծովային մարշալ) Յովհաննէս Իսակով: Տարբեր կարգի մետալներով պարգեւատրուած 80000 մարտիկ:

Հանդիպման հիւրն էր՝ հագուստի ձեւաւորող դասատու՝ Տ.Անահիտ Յովհաննիսեան: ՏԱնահիտ Յովհաննիսեան կը տիրապետէ երեք մասնագիտութեան. Ճարտարագէտ, հոգեբան, իսկ 20 տարի է որ կ’աշխատի որպէս դերձակ,հագուստի ձեւաւորող: Ան դասաւանդած է շարք մը ուսումնական կեդրոններու մէջ: Մէկ տարի է ունի անձնական «Մոտ Անա» նորաձեւութեան սրահը, ուր կը դասաւանդէ հագուստի ձեւաւորում, զարդագործութիւն, վարագոյրներու նախագծում, հելունագործութիւն,  պայուսակներու, գօտիներու, գլխարկներու,  կրծքազարդերու ձեւաւորում:

Տ.Անահիտ Յովհաննիսեան ցուացադրեց թէ ինչպէ՞ս կարելի է անգործածելի հագուստի կամ կերպասի մը նոր կեանք տալ, տղամարդու վերնաշապիկը փոփոխելով ստանալ կանացի վերնամաս կամ հագուստ, թիկնոցի վրայ թեւի անցքեր բանալով վերածել «ժիլէ»ի, ուղղանկիւն կտոր մը թաղիքէ պատրաստել գեղեցիկ եւ գործնական պայուսակ եւ զարդարել համապատասխան զարդերով: Ան յորդորեց ներկաներուն օգտուիլ իրենց տան մէջ ունեցած ամենաանհաւանական կամ անգործածելի կտորներէ: Ներկաները մեծ ոգեւորութեամբ հետեւեցան բացատրութիւննդրուն եւ շատ գործնական եւ կիռարելի գտան տրուած խորհուրդները,որոշեցին իրենք եւս ստեղծագործել իրենց ձեռքին տակ գտնուող կամ հասանելի եղող կերպասներով:Ապա,տեղի ունեցաւ հիւրասիրութիւն եւ ջերմ մթնոլորտի մէջ աւարտեցաւ հաւաքը:

Մայտա Չաւուշեան