«Սոցիալ-հոգեբանական աջակցություն սիրիահայերին» ծրագրի հերթական հանդիպումը՝ խնամակալութիւն, որդեգրում եւ խնամատարութիւն

Ուրբաթ՝ 15 Մարտ 2019-ին, ժամը 2-ին տեղի ունեցաւ սոցիալ հոգեբանական խմբակի ընթացիկ հանդիպումը, ներկայ էին 48 ընկերուհիներ: Հանդիպումը վարեց «ՀԱԼԷՊ» ՀԲՀԿ-ի հիմնադիր փոխ նախագահ՝ Ծովիկ Մակարեան-Պայթարեան: Յառաջիկային կայանալիք գործունէութեան մասին կարծիքներու փոխանակումէն ետք, Ծովիկ Մակարեան-Պայթարեան ներկայացուց օրուան դասախօսները՝ Մարգարիտա Տէր Յովհաննիսեան եւ Տաթեւ Ղազարեան: Օրուան նիւթն էր՝ երկկողմանի եւ միակողմանի ծնողազուրկ երեխաներու խնամակալութեան, որդեգրման եւ խնամատարութեան Հայաստանի Հանրապետութեան մէջ կիրառուող օրէնքները, գոյութիւն ունեցող հաստատութիւնները եւ անոնց գործունէութիւնը: Հանդիպման նպատակն էր՝ այդ գործունէութեան մասին իրազեկ դարձնել Սուրիահայ ընկերուհիները:

Մարգարիտա Տէր-Յովհաննիսեան, ՀՕՖ-ի Երեխաներու աջակցութեան կեդրոնի մասնագիտական խումբի ղեկավար, խնամատարութեան մասնագէտ, ներկայացուց խնամատարութեան գործընթացը, թէ ինչպէ՞ս կարելի է դառնալ խնամատար ծնող, ո՞ր դէպքերուն հնարաւոր է ստանձնել երեխայի խնամքը, ինչքա՞ն կը կազմէ վարձատրման կարգը եւ այլ հարցերու պատասխաններ։ Ծրագրի իրականացման ընթացքին ան մասնակցած է խնամատարութեան իրազեկման, խնամատար ընտանիքներու վերապատրաստման, երեխաներուն խնամատար ընտանիքներու հետ համադրման, վերջնական տեղաւորման եւ շարունակական վերահսկողութեան աշխատանքներուն: Ան շեշտեց, որ իւրաքանչիւր երեխայ ընտանեկան սիրոյ և ջերմութեան կարիք ունի։

Տաթեւ Ղազարեան՝ սոցիալական աշխատող, ունի սոց.-քաղաքականութեան եւ վարչարարութեան մագիստրոսի աստիճան, կ’աշխատի Հ.Օ.Ֆ-ի երեխաներու աջակցութեան կեդրոնին մէջ, որպէս սոցիալական աշխատող, մասնաւորապէս տեղահանուած երեխաներու հետ. ունի վերապատրաստումներու կազմակերպման հմտութիւններ եւ փորձ:

Մարգարիտա Տէր Յովհաննիսեան մանրամասնօրէն ներկայացուց խնամակալութեան, որդեգրման եւ խնամատարութեան Հայաստանի մէջ տարուած աշխատանքը, օրէնքները եւ հաստատութիւնները, այնտեղ ապրող երեխաներու եւ ընտանիքի կողմէ խնամակալութեան եւ խնամատարութեան տակ գտնուող երեխաներու հոգեբանական եւ մարմնական տարբերութիւնները, խնամատարութեան առաւելութիւնները: Մ.Տէր-Յովհաննիսեան նաեւ շեշտեց, որ խնամատարութեան օրէնքը հայ հասարակութեան մէջ հաստատուած է Ներսես կաթողիկոսի կողմէ, տակաւին 4-րդ դարուն: Խնամատարութիւնը երեխաներուն ընտանեկան մթնոլորտի մէջ պահելու եւ անոնց հոգեկան եւ կենցաղային պահանջները ապահովելու լաւագոյն միջոցն է:

Տաթեւ Ղազարեան ներկայացուց Սուրիահայ տեղահանուած ընտանիքի մը միակողմանի ծնողազուրկ երեք անչափահաս երեխաներու հետ տարուած աշխատանքը Հ.Օ.Ֆ-ի կողմէն, ինչպէս նաեւ, յառաջիկային, անոնց խնամատարութեան, կենցաղային եւ հոգեբանական աջակցութեան ապահովման անհրաժեշտութեանը:

Առ ի յիշեցում, «ՀԱԼԷՊ» ՀԲՀԿ-ի «Սոցիալ-հոգեբանական աջակցություն սիրիահայերին» ծրագիրը կը կազմակերպուի անվճար: Հանդիպումներու նպատակն է օժանդակել սուրիական հակամարտութեան մէջէն անցած և ծանր հոգեբանական դրութեան մէջ յայտնուած անձերու վերականգնման գործընթացին և նպաստելու իրենց ներգրաւումը հայաստանեան քաղաքացիական կեանքին մէջ:

Սոյն հաւաք-հանդիպումի ընթացքին կը հրաւիրուին դասախօսներ, որոնք իրենց գիտելիքները և փորձառութիւնները կը փոխանցեն ներկաներուն:

Մայտա Չավուշեան