«Սոցիալ-հոգեբանական աջակցություն սիրիահայերին» ծրագրի հերթական հանդիպումը՝ Մայրերու օր

Ուրբաթ՝ 22 Մարտ 2019-ին, ժամը 2-ին տեղի ունեցաւ սոցիալ հոգեբանական խմբակի հերթական հանդիպումը, 72 ընկերուհիներու ներկայութեամբ: Հանդիպումը վարեց «ՀԱԼԷՊ» ՀԲՀԿ-ի հիմնադիր փոխ նախագահ՝ Ծովիկ Մակարեան-Պայթարեան: Ներկաներուն «Մայրերու տօն»-ը շնորհաւորելէ ետք, Ծովիկ Մակարեան-Պայթարեան խօսքը փոխանցեց հայկական աւանդական ասեղնագործութեան հմուտ պատրաստող-դասաւանդող և «ՀԱԼԷՊ» ՀԲՀԿ-ի Կամաւոր Տիկնանց յանձնախումբի անդամ՝ Վանիա Մսրիէ-Գարաճեանին, որ իր կարգին խօսեցաւ օրուան սրբազան խորհուրդին մասին:

Ան իր խօսքին մէջ ներկայացուց հայ մայրը պատմութեան ընթացքին, ինչպէս նաև շեշտեց, մինչև օրս, հայ մօր մեծ դերակատարութեան մասին հայապահպանման գործընթացին մէջ: Վանիա Մսրիէ-Գարաճեան անդրադարձաւ նաև սուրիահայ մայրերուն, որոնք իրենց ցաւը կողմ դնելով, կրկին անգամ ոտքի կանգնեցան ու նուիրուեցան ազգապատկան աշխատանքներու:

 

Խօսքին յաջորդեց Մեծն բանաստեղծ՝ Եղիշէ Չարենցի «Մօրս Համար Գազել» ասմունքը, Կալի Մարգարեանի յուզիչ կատարումով. որմէ ետք ներկաներուն մէջ գտնուող ամեանատարեց մայրը՝ Լուսին Չոփուրեան պարգեւատրուեցաւ խորհրդանշական նուէրով մը:

 

Սօսի Նալչաճեանի պատրաստած համեղ հիւրասիրութենէն ետք, ներկաները բարձր տրամադարութեամբ մասնակցեցան անուններու խաղին, որուն յաղթող հանդիսացաւ երէցկին՝ Մարի Պալգէորգեան ու ստացաւ փոքր նուէր մը:

«Ըլլանք առողջ» խորագրով հանդէս եկաւ Երևանի Պետական Բժշկական համալսարանի շրջանաւարտ և «ՀԱԼԷՊ» ՀԲՀԿ-ի Կամաւոր Տիկնանց յանձնախումբի անդամ, բժշկուհի՝ Մայտա Չաւուշեան: Ան խօսեցաւ միջին ականջի բորբոքման մասին ու մեծ սիրով պատասխանեց ականջի, ճնշման ու եղանակի փոփոխութեան հետ կապուած հարցերուն:

Հաւաքի աւարտին Ծովիկ Մակարեան-Պայթարեան սոցիալ հոգեբանական խմբակը ուղղորդեց Հիւսիսային պողոտայի վրայ գտնուող ԱԼԵՊՊՈ ՔՈՒԻԶԻՆ-ի (ALEPPO CUISINE) ժամանակաւոր տնակ, ուր Արարատեան Հայրապետական թեմի Մրգաւան գիւղի Ս․ Յակոբ եկեղեցւոյ հոգևոր հովիւ Տ․Պարգև քահանայ Պալգէորգեան օրհնեց տնակը, բարի պահեցողութիւն և յաջողութիւն մաղթեց «ՀԱԼԷՊ» ՀԲՀԿ-ի աշխատանքներուն:

Առ ի յիշեցում, «ՀԱԼԷՊ» ՀԲՀԿ-ի «Սոցիալ-հոգեբանական աջակցություն սիրիահայերին» ծրագիրը կը կազմակերպուի անվճար: Հանդիպումներու նպատակն է օժանդակել սուրիական հակամարտութեան մէջէն անցած և ծանր հոգեբանական դրութեան մէջ յայտնուած անձերու վերականգնման գործընթացին և նպաստելու իրենց ներգրաւումը հայաստանեան քաղաքացիական կեանքին մէջ:

Սոյն հաւաք-հանդիպումի ընթացքին կը հրաւիրուին դասախօսներ, որոնք իրենց գիտելիքները և փորձառութիւնները կը փոխանցեն ներկաներուն:

Վանիա Մսրիէ-Գարաճեան

 

ՄՕՐՍ ՀԱՄԱՐ ԳԱԶԵԼ

Յիշում եմ դէմքը քո ծեր, մայր իմ անուշ ու անգին,
Լոյս խորշոմներ ու գծեր, մայր իմ անուշ ու անգին:

Ահա նստած ես տան դէմ, ու կանաչած թթենին
Դէմքիդ ստուէր է գցել, մայր իմ անուշ ու անգին:

Նստել ես լուռ ու տխուր, հին օրերն ես յիշում այն,
Որ եկել են ու անցել, մայր իմ անուշ ու անգին:

Եւ յիշում ես քո որդուն, որ հեռացել է վաղուց,-
Ո՞ւր է արդեօք հեռացել, մայր իմ անուշ ու անգին:

Ո՞ւր է արդեօք հիմա նա, ո՞ղջ է արդեօք, թէ մեռած,
Եւ ի՞նչ դռներ է ծեծել, մայր իմ անուշ ու անգին:

Եւ երբ յոգնած է եղել, և երբ խաբուել է սիրուց –
Ո՞ւմ գրկում է հեծեծել, մայր իմ անուշ ու անգին:

Մտորում ես դու տխուր, և օրրում է թթենին
Տխրութիւնը քո անծիր, մայր իմ անուշ ու անգին:

Եւ արցունքներ դառնաղի ահա ընկնում են մէկ-մէկ
Քո ձեռքերի վրայ ծեր, մա՜յր իմ անուշ ու անգին…