«Սոցիալ-հոգեբանական աջակցություն սիրիահայերին» ծրագրի հերթական հանդիպումը` Ծիսական Տիկնիկներ

«Հալէպ» հայրենակցական բարեսիրական հասարակական կազմակերպութեան, Սոցիալ հոգեբանական աջակցութեան խմբակի ընթացիկ ժողովը տեղի ունեցաւ 12 Ապրիլ, 2019-ի կէսօրէ ետք ժամը 2-ին, ներկայ էին 36 ընկերուհի:

Հաւաքը վարեց կազմակերպութեան հիմնադիր փոխնախագահ՝ Ծովիկ Մակարեան-Պայթարեան։ «Ծանօթանանք մեր արժէքներուն» խորագրին տակ ան ներկայացուց Երեւանի Ծիծեռնակաբերդի բարձունքին վրայ գտնուող Եղեռնի յուշահամալիրը։

Յուշահամալիրը կառուցելու գաղափարը ծնած է 1965-ին՝ Եղեռնի յիսնամեակին, աւարտին հասած է 1967-ին: Յուշահամալիրը կ’ընդգրկէ երեք կառոյց՝ Յաւերժութեան տաճար, Յուշասիւն եւ Յուշապատ։ Յաւերժութեան տաճարը կը ներկայացնէ 12 սալերէ կազմուած շրջանակ, որոնք խոնարհած դիրքով կառուցուած են դէպի յաւերժական կրակը։ Յուշասիւնը կը խորհրդանշէ Հայ ժողովուրդի վերածնունդը։ Յուշապատը՝ նուիրուած է մեր կորուսեալ հայրենիքի նահանգներուն։ Կառոյցը դարձած է ուխտավայր համայն հայութեան համար։

Օրուան նիւթն էր՝ «Հայկական Ծիսական Տիկնիկները»։ Նիւթը պատրաստած էր Մայտա Չաւուշեանը: Հայկական տօնական կամ ծիսական տիկնիկները նուիրուած են նախաքրիստոնէական եւ քրիստոնէական տօներուն։ Անոնք պատրաստուած են մամիկներու ձեռքերով։ Իրենց մէջ պահած են մարդոց հաւատալիքներն ու ակնկալիքները։ «Նուրին» կամ անձրեւի հարսը՝ ջուր եւ անձրեւ սպասող գիւղացիին յոյս տուած է, «Ակլատիզը» կամ պաս պապը՝ հսկած է օրինազանց պահք պահողները, «Օժիտի տիկնիկը»՝ ընկեր եւ սփոփող եղած է նորահարսին։

Հանդիպման ընթացքին, ներկայացուեցաւ տիկնիկներու պատրաստման եղանակը եւ իրենց մէջ պահուած խորհուրդը։ Ներկաներուն «Նուրի» տիկնիկին նուիրուած երգի հնչիւններուն տակ բաժնուեցան յանձնախումբի ընկերուհիներուն պատրաստած «Նուրի» տիկնիկներ, որոնցմով ներկաները շատ ոգեւորուեցան։

Աւարտին, ներկաներուն փոխանցուեցաւ Գ. Սունդուկեանի եւ Յ. Պարոնեանի անուան թատրոններու տրամադրած երեք տարբեր ներկայացումներու տոմսեր։