Կազմակերպությունն  իր շուրջը համախմբված բարերարների միջոցով  անցյալ տարվա մայիսից 250 ընտանիքի համար միակողմանի տոմս է առել, որոնք Հալեպից փոխադրվել են Հայաստան,  ևս 100 հոգու տոմսերը պատրաստ են, և մինչև նոյեմբեր կգան, հարյուրավորներ էլ ունեն  ցանկություն և դեռ սպասում են իրենց տոմսերին,  ինչի հնարավորությունը, ինչպես մեզ հետ զրույցում ասաց Անի Բալխյանը, «Հալէպ» հ/կ-ն այս պահին չունի և հովանավորներ է փնտրում:

Ինչպես տեղեկացանք, Հայաստան գալուց հետո յուրաքանչուրին տրվում է 100 ԱՄՆ դոլար, ինչը, ըստ Անի Բալխյանի, բավական մեծ գումար է, ասենք չորս հոգանոց ընտանիքի համար. «Եթե ընտանիքի ամեն անդամ 100 դոլար ստանա, գոնե սկզբում կարող են իրենց պետքերը հոգալ»,-ասաց մեր զրուցակիցը:  Այդ գումարը կազմակերպությունը կրկին բարերարներից է ստանում:

Հայաստան եկած կարիքավոր սիրիահայերի տան վարձի հարցերը OXFAM-ի հետ Հայաստանում գործող ևս մի քանի միջազգային կառույցներ են հոգում (ինչպես` «Առաքելություն Արևելք», «Առաքելություն Հայաստան», «Armenian Redwood Project» և այլն): Նրանք առաջիկա մեկ տարվա ընթացքոմ ևս  կվճարեն 300 ընտանիքի տան վարձ, և այն 100 հոգին, որ առաջիկայում գալու են, ըստ Անի Բալխյանի, առաջնահերթություն ունեն օգտվելու այդ օգնությունից:

Անի Բալխյանը նաև նշում է, որ, «ՀալԷպ» կազմակերպությունն անընդհատ զանգեր ու նամակներ է ստանում՝ հիմնականում Սիրիայում մնացած կարիքավոր ընտանիքներից, բայց ինչպես կազմակերպության ղեկավարն է դատում  դիմումների թվից. «Եթե 20 հազարանոց սիրիահայ համայնքից (20 հազար սիրիահայը ասելով նա նկատի ունի ամբողջ Սիրիայի տարածքում ապրող հայերի թիվը, որոնցից միայն 6-7 հազարը Հալեպում է-խմբ.) ընդամենը 600–ն է ուզում գալ, ուրեմն կարիքավորների թիվն այնքան էլ մեծ չէ: Ունևորներն իրենք են որոշում՝ իրենց տոմսերը առնե՞լ, գնա՞լ, կամ՝ մնա՞լ»:  Եւ առհասարակ, գալու-մնալու հարցը, ըստ Անի Բալխյանի, անհատական որոշում է, և ոչ ոք չի կարող ոչ մեկին ստիպել՝ գալ կամ մնալ: «Բայց գալու դեպքում լավ կլինի, որ Հայաստան գան, որպեսզի Հայաստանում գոնե պահպանվի սիրիահայ համայնքը, չցրվի աշխարհով մեկ»,-իր մտահոգությունն է հայտնում Անի Բալխյանը: Այդ առումով Անի Բալխյանը հայացքն ուղղում է նախ  սփյուռքի ուժերին և կոչ է անում սփյուռքահայ մեծատուններին՝ ջանքեր գործադրել և Հայաստանում պահել սիրիահայ մայր գաղութը:

Սեպտեմբերի 30-ից ի վեր Հալեպում իրավիճակի սրացումից հետո հոկտեմբերի 7-ին «ՀալԷպ» կազմակերպության միջոցով արդեն 3 ընտանիք ստացել է միակողմանի տոմս և Երևանում է: Անի Բալխյանը նշեց նաև, որ շատ հայաստանցիներ են պատրաստակամություն հայտնում օգնել կամ հյուրընկալել սիրիահայերին. կազմակերպությունը գրանցում է նրանց տվյալները և ասաց, որ եթե պետք լինի, կդիմի նաև նրանց օգնությանը:

«Արևելք» լրատվականի տեղեկություններով, Սփյուռքի նախարարությունը նույնպես աշխատում է վերջին սրացումներից հետո Հայաստան գալ ցանկացող հալեպահայերին օգնելու ուղղությամբ, բայց զանգվածային տարհանման ծրագիր, այս պահին ո՛չ Հայաստանի հանրապետությունը, ո՛չ էլ սիրիահայ համայնքային ղեկավարությունը չունի: Սփյուռքի փոխնախարարին տված իր հարցազրույցում Սիրիայի խորհրդարանի պատգամավոր  Ժիրայր Ռեյիսյանն ասել է, որ չնայած հրթիռակոծություններ և զոհեր կան, սիրիահայերը հանգիստ են և խուճապի մեջ չեն:

Աղբյուրը՝ «Արևելք» լրատվական